RATHASAPTHAMI

[radha]

OM SRI GURUPYO NAMAHA:,RESPECTFUL PRANAMS TO SRI KANCHI MAHA PERIVA


தைமாத அமாவாசைக்கு பிறகு வரும் 7வது நாள் ரத சப்தமி என்று போற்றப்படுகிறது. இது ஒரு விரத நாள்.
சூரியன் தனுர் ராசியிலிருந்து மகர ராசிக்கு பிரவேசிப்பது, பொங்கல விழாவாகக் கொண்டாடப்படுகிறது. ஆனால், உண்மையில் அமாவாசைக்கு அடுத்த வளர்பிறை ஏழாம் நாளான சப்தமி அன்றுதான் சூரியன் தேரானது வடக்கு திசை நோக்கி திரும்புகிறது. இதை ரச சப்தமி, மகா சப்தமி, ஜெயந்தி சப்தமி என்று சொல்வர். அன்று சூரியனுக்கு விசேஷமான ஒளி பிறக்கிறது என்று சாஸ்திரங்கள் சொல்கின்றன.
சூரியனின் தேருக்கு மற்ற ரதங்களில் உள்ளது போல் இரண்டு பக்கங்களிலும் சக்கரங்கள் கிடையாது. ரதத்தின் மையப் பகுதியில் மட்டும் ஒரே ஒரு சக்கரம் உண்டு. இச்சக்கத்தின் குடத்தில் மூன்று மேகலைகள் மட்டும் இருக்கும். அந்த மூன்று மேகலைகள் காலை, நண்பகல், மாலை ஆகியவற்றைக் குறிக்கின்றன. இந்த ஒற்றைச் சக்கரத்தில் ஆரங்கள் இருக்கும். வெளிவட்டத்தில் உள்ள ஆறு பருவங்களைக் குறிக்கின்றன. அவை கார்காலம், இலையுதிர்காலம், முன்பனிக்காலம், பின்பனிக்காலம், இளவேனிற்காலம், முதுவேனிற்காலம் ஆகும்.
சூரிய ரதத்தினை ஏழுகுதிரைகள் இழுக்கின்றன. அவை ஏழு நிறங்களைக் குறிக்கின்றன. ஊதா, கருநீலம், நீலம், பச்சை, மஞ்சள், ஆரஞ்சு, சிவப்பு என்ற வானவில்லின் நிறங்களே அவை. சூரியனுடைய ஒளியில் காணப்படும் வண்ணஜாலத்தின் காரணம் இதுவே. ரதசப்தமி நாளை சில திருத்தலங்களில் தீர்த்தவாரி நாளாகக் கொண்டாடுகிறார்கள். ரத சப்தமியன்று சூரிய தேவனை வழிபட்டு விரதம் கடைபிடித்து அருகில் உள்ள ஆலயங்களுக்குச் சென்று இறைவனை அர்ச்சித்து வழிபட்டால் நவகிரக தோஷங்கள் விலகும்.
சூரிய தோஷம் நீங்கவும். சூரியனின் அருள் பெறவும், நவகிரகத் தொகுப்பில் உள்ள சூரிய பகவானுக்காவது அல்லது சில கோயில்களில் தனித்துக் காணும் சூரிய பகவான் விக்ரகத்திற்காவது அபிஷேகம் செய்விப்பது சிறப்பு. அன்று அவருக்கு சிவப்பு வஸ்திரம் அணிவித்து, சிவப்பு மலர்களால் அர்ச்சித்து வழிபட்டால் அனைத்து தோஷங்களும் நீங்கும்.
சூரிய தீர்த்தங்கள் பல திருத்தலங்களில் உள்ளன. காஞ்சியில் உள்ள சூரிய தீர்த்தம், பரிதிக் குளம் எனப்படுகிறது. திருமீயச்சூர், திருக்கோலக்கா, திருசெம்பொன்பள்ளி, ஆகிய தலங்களிலும் உள்ள குளங்களில் நீராடினால் சூரிய தோஷம் நீங்கும். இறைவனுடைய ஞானசக்தியான அருள்தான் சூரியன். அந்த ஞானசக்தி ஒரு தை மாத வளர்பிறை சப்தமி திதி நாளில் வெளிப்பட்டதாக புராணம் கூறும். மேலும் சூரியன் தோன்றியபோது அதன் ஒளிக் கதிர்களின் வீச்சு அளவுக்கதிகமான உஷ்ணமும் ஒளியும் கொண்டிருந்தனவாம். அதனை பூலோகவாசிகள் தாங்கமாட்டார்கள் என்பதற்காக இறைவனின் ஆணைப்படி விஸ்வகர்மா கதிர்களின் கூர்மையைக் குறைத்தாராம். அந்த நாள் சப்தமி என்று புராணம் கூறும்.
ரதசப்தமி விரதம் கடைபிடிப்பவர்கள் அன்று அதிகாலையில் நீராட வேண்டும் அப்போது ஏழு எருக்கு இலைகளை எடுத்துக் கொள்ள வேண்டும். அவற்றின் மேல் சிறிது அரிசி, அருகம்புல் ஆகியவற்றை வைத்து உச்சந்தலையில் வைத்தக் கொண்டு சூரிய பகவானை நினைத்த நீராட வேண்டும். இது ஆண்களுக்குரிய நீராடல். மேலே சொன்ன பொருட்களுடன் சிறிதளவு மஞ்சள்தூளையும் சேர்த்து கொண்டு பெண்கள் தலைக்குக் குளிக்க வேண்டும். நீராடல் முடிந்ததும் சூரியன் உதிக்கும் கிழக்கு திசை நோக்கி சூரிய வழிபாடு செய்வதால் கண்ணொளி பிரகாசிக்கும். சரும நோய்கள் ஏற்படாது. புத்துணர்ச்சி உண்டாகும். சூரிய தோஷங்கள் நீங்கி சுகமான வாழ்வு கிட்டும்.
ரத சப்தமி அன்று மட்டும் சூரிய வழிபாடு செய்வதுடன் நிறுத்திக் கொள்ளாமல் தினமும் சூரிய நமஸ்காரம் முறைப்படி செய்தால் கிடைக்கும் பலன்கள் ஏராளம்!


SRI KANCHI MAHA PERIVA THIRUVADIGAL CHARANAM
SOURCE.:Kumudam Bhakthi FebFirst

[radha]

HARI OM !---ANOTHER ARTICLE ON RATHASAPTAMI--INDU(HINDU PAPER)

ரத சப்தமி -பிப்ரவரி 6: வளம் தரும் விரதம்

விக்னேஷ்


ஆறு மதங்களான காணாபத்தியம், வைணவம், சைவம், சாக்தம், கெளமாரம், செளரம் ஆகியவற்றில் செளரம் என்பது சூரியனைப் போற்றுதல் ஆகும். சூரிய பகவான் வைணவத்தில் சூரிய நாராயணன் என்றும், சைவத்தில் சிவச் சூரியன் என்றும் கொண்டாடப் படுகிறார். சூரியனைத் தைப் பொங்கல் அன்று மேலே கூறப்பட்ட ஆறு வகை மதத்தினரும் கொண்டாடுகின்றனர். ஆறுகள் , காடுகள் போன்ற இயற்கை செழிக்க முதற் காரணமான சூரியனை விரதமிருந்து வழிபட்டால் வாழ்வில் அனைத்து நலங்களும் தடையின்றி வந்து சேரும்.

இந்த விரதம் இருந்து வழிபட உகந்த நாள் ரத சப்தமி. ஒவ்வொரு ஆண்டும் தை மாதம் வளர்பிறை ஏழாம் நாள் இந்த விரதம் அனுஷ்டிக்கப்படுகிறது. இந்த ஆண்டு பிப்ரவரி 6ஆம் தேதியன்று ரத சப்தமி வருகிறது. இந்த ரத சப்தமியன்று புண்ணிய ஆறு கள் மற்றும் தீர்த்தங்களில் பக்தர்கள் புனித நீராடி சூரியபகவானை வழி்படுவர். உலகிற்கு ஒளி தரும் சூரிய பகவானுக்கு உரிய விரதங்களில் மிக முக்கியமானது இந்த ரத சப்தமி.

சூரியன் தோன்றிய வரலாற்றினைப் புராணங்கள் தெரிவிக்கின்றன. காஷ்யப மகரிஷியின் மனைவி அதிதி கர்ப்பமாக இருந்த நேரத்தில் கணவருக்கு உணவு பரிமாறிக்கொண்டிருந்தாள். அந்த நேரத்தில் அந்தணர் ஒருவர் அங்கு வந்து உணவு கேட்டார். கணவருக்கும் பரிமாறியபின்னர் நிறைமாத கர்ப்பம் என்பதால் மிக மெதுவாக நடந்து வந்த அதிதி அந்தணருக்கு உணவு அளித்தாள்.

இதனால் கோபம் கொண்ட அந்தணர், கர்ப்பத் தைப் பாதுகாப்பதற்காக மெதுவாக நடந்து வந்ததால் அந்த கர்ப்பம் கலைந்து போகட்டும் என்று சாபம் இட்டார். அந்தணரின் சாபம் கேட்டு அதிர்ச்சியடைந்த அதிதி தன் கணவரிடம் நடந்தவற்றை விளக்கினாள்.

இதைக்கேட்ட காஷ்யப முனிவர், அமிர்தம் நிறைந்த உலகில் இருந்து என்றைக்கும் அழிவில் லாத மகன் பிறப்பான் என்று வாக்களித்தார். அதன் படி ஒளி பொருந்தியவனாக உலகைக் காக்கும் சூரியன் பிறந்தான்.

விரத முறை

ஏழு குதிரைகள் பூட்டிய தேரில் சூரியன் உலா வருவதால் திதிகளில் ஏழாவது நாள் சப்தமி விரதம் அனுஷ்டிக்கப்படுகிறது. செல்வம் பெருகும் இந்த விரதம் எளிமையானது.

ஏழு எருக்கம் இலைகளை தலையில் ஒன்று, மூடிய இரு கண்களில் கண் ஒன்றுக்கு ஒன்று வீதம் இரண்டு, அதுபோல தோள்பட்டைகளில் இரண்டு, கால்களில் இரண்டை வைத்து நீராட வேண்டும். தலையில் வைக்கும் இலையில், பெண்கள் மஞ்சள் பொடி மற்றும் அட்சதையும், ஆண்கள் அட்சதை மட்டும் வைத்துக்கொள்ள வேண்டும். இவ்வாறு செய்வது ஆரோக்கியத்தையும், செல்வ வளத்தையும் தரும்.

ரத சப்தமி நாளில் செய்யப்படும் தர்மத்திற்கு பல மடங்கு புண்ணியம் உண்டு. இந்த நாளில் தொடங்கும் தொழில் பெருகும். பெண்கள் உயர் நிலையை அடைவர். கணவனை இழந்தவர்கள் இந்த விரதம் அனுஷ்டித்தால் அடுத்து வரும் பிறவிகளில் இந்த நிலை ஏற்படாது என்கின்றன புராணங்கள்.

இந்நாள் தியானம் செய்ய உகந்தது. அன்றைய தினம் சூரிய உதயத்தின் போது இவ்வாறு எருக்க இலையைத் தலையில் வைத்துக் குளித்து விரதம் அனுஷ்டித்தால் செல்வந்தர் ஆக உயர்வார்கள் என்கிறது புராணம்.

பீஷ்மர் செய்த பாவம்

எருக்கம் இலையின் மகத்துவம் வியாசரால் மகாபாரதத்தில் விளக்கப்பட்டுள்ளது. மகாபாரதப் போரில் வீழ்த்தப்பட்ட பீஷ்மர் நினைத்த நேரத் தில் உயிர் விடலாம் என்ற வரம் பெற்றவர். உத்தராயணத்தில் உயிர் விடவேண்டி அம்புப் படுக்கையில் படுத்திருந்து காத்திருந்தார். காலம் போய்க்கொண்டே இருந்தது. பீஷ்மரின் உயிரோ பிரியவில்லை. அப்பொழுது அவரைப் பார்க்க வந்த வேத வியாசரிடம், நான் என்ன பாவம் செய்தேன்? ஏன் இன்னும் என் உயிர் போகவில்லை?" என்று மனம் வருந்தினார் பீஷ்மர். அதற்கு வியாசர், "பீஷ்மா, ஒருவர், தன் மனம், மொழி, மெய்யால் தீமை புரியாவிட்டாலும், பிறர் செய்யும் தீமைகளைத் தடுக்காமல், இருப்பதும் கூடப் பாவம்தான், அதற்கான தண்டனையை அவரவர்களேதான் அனுபவித்துத் தீர வேண்டும்“ என்று கூறினார்.

பீஷ்மருக்கு, சபை நடுவே பாஞ்சலியின் உடைகளைக் களைந்து துச்சாதனன் அவமானம் செய்தபோது அதைத் தடுக்காமல் இருந்து மிகப் பெரிய தவறு செய்தது நினைவிற்கு வந்தது. இதற்கு விமோசனம் இல்லையா என்று கேட்டதற்கு, வியாசர், ``எப்பொழுது உன் பாவத்தை உணர்ந்தாயோ, அப்போது அப்பாவம் அகன்றுவிட்டாலும் அனைத்தையும் கண்டும் காணாமல் இருந்த கண்கள், செவி, வாய், தோள், கைகள், புத்தி உள்ள தலை ஆகியவை தண்டனையை அனுபவித்துதானே ஆக வேண்டும “ என்றார் வியாசர்.

சூரியனின் நெருப்பைக் கொண்டு தன்னைப் சுட்டுப் பொசுக்குமாறு வேண்டுகிறார் பீஷ்மர். இதற்கு எருக்க இலையை காட்டிய வியாசர், ``அர்க்கம் என்றாலே சூரியன் என்று பொருள். பிரம்மச்சாரியான விநாயகருக்கு உகந்தது எருக்க இலை. அதேபோல் பிரம்மச்சாரியான உன்னையும் இந்த எருக்க இலையால் அலங்கரிக்கிறேன்” என்றார்.

சிறிது சிறிதாக அமைதியடைந்த பீஷ்மர் ஏகாதசி யன்று உயிர் நீத்தார். பீஷ்மருக்கு வாரிசுகள் யாரும் இல்லாததால் நீத்தார் கடன் செய்வது குறித்து வியாசரிடம் வேண்டுகிறார் தர்மர். அதற்கு பதிலளித்த வியாசர், “கவலைப்படாதே தர்மா, சூரியனுக்காக எருக்க இலை சூடி விரதம் இருக்கும் ரத சப்தமி நாளில் பாரத தேசமே பீஷ்மருக்காக நீர்க்கடன் அளிக்கும்” என்று கூறினார்.

ரத சப்தமி நாளில் எருக்க இலைகளை வைத்துக் கொண்டு குளிக்கும் பக்தர்கள் தங்கள் பாவங்களில் இருந்து விடுவித்துக்கொள்வதோடு, பீஷ்மருக்கு நீர்க்கடன் அளித்த புண்ணியம் கிடைக்கும் என்று வியாசர் அருளினார்.

ரத சப்தமி நாளில் தஞ்சை மாவட்டம் சூரியனார் கோவில், திருமலை னிவாசப் பெருமாள் உள்பட பல ஆலயங்களில் திருவிழாவாக கொண்டாடப் படுகிறது. ஏழு மலைகளை ஏழு குதிரைகளாக பாவித்து, ரத சப்தமி விழா கொண்டாடப்படுகிறது. இந்த நாளில் ஏழு வாகனங்களில் மலையப்ப சுவாமி மாட வீதிகளில் ஊர்வலமாகத் திருவீதி உலா வருவது கண் கொள்ளாக் காட்சியாக இருக்கும். ரங்கம் ரங்கநாதர் கோவிலிலும் ரத சப்தமி சிறப்பாகக் கொண்டாடப்படுகிறது.