ANNABHISHEKAM TO LORD SIVA

[radha]

OM SRI GURUPYO NAMAHA,RESPECTFUL PRANAMS TO SRI KANCHI MAHA PERIVA.



விஜயலட்சுமி சுப்பிரமணியம்

அன்னாபிஷேகம்

அனைத்து ஜீவராசிகளுக்கும் உணவளிக்கும் “அன்னதாதாவாக” “அன்னப் பிரபுவாக” திகழும் சிவபெருமானை ஒருமுறை பார்வதி தேவி பரிசோதிக்க எண்ணி ஒரு எறும்பை பிடித்து ஒரு சிறிய சிமிழில் வைத்து மூடி, சிவபெருமானிடம் சென்று “நீங்கள் அனைத்து ஜீவராசிகளுக்கும் இன்றைய அன்னத்தை அளித்துவிட்டீர்களா?” என்று கேட்டாள். பெருமானும் “ஆமாம் அளித்துவிட்டேன்” என்று கூற “இதோ இந்தச் சிறிய சிமிழியில் உள்ள எறும்புக்கு நீங்கள் உணவளிக்கவில்லை” என்று தேவி கூறினாள். சிவபெருமானும் பொறுமையாக, அதைத் திறந்து பார்க்குமாறு கூற, தேவி திறந்து பாரத்தபோது, அந்த சிறிய எறும்பின் வாயில் ஒரு அரிசி இருந்த்தைக் கண்டு வியப்பில் ஆழ்ந்து போனாள். மூல முழு முதற் கடவுளான சிவபெருமான் அனைத்து ஜீவராசிகளுக்கும் அன்னமளித்துக் காப்பாற்றுகிறார் என்ற கருத்தை வலியுறுத்தும் வகையில் இந்தக் கதையைப் பெரியவர்கள் கூறுவதுண்டு.



சிவபெருமான் அபிஷேகப் பிரியர் என்பது அனைவரும் அறிந்ததுதான். தமிழகத்திற்கு வடக்கே உள்ள அனைத்து ஆலயங்களிலும் சிவபெருமான் லிங்கத்திற்கு மேல தொடர்ந்து தாரையாக தண்ணீர் விழும் வகையில் தாராபாத்திரம் அமைந்திருப்பதைக் காணலாம். பதினாறு வகையான திரவியங்களைக் கொண்டு சிவபெருமானுக்கு திருமஞ்சனங்கள் செய்யப்படுகின்றன. தனது சிரசின் மீது கங்கையைத் தரித்திருக்கும் சிவபெருமான் எப்போதும் புனித கங்கை நீரின் திருமஞ்சனத்தில் குளித்துக் கொண்டிருக்கிறார்.

சிவபெருமானுக்கு ஆண்டிற்கு ஒரு நாள் மட்டும் சிவலிங்கத்தை மூடுகின்ற வகையில் அன்னத்தால் அபிஷேகம் செய்யப்படுகிறது. அன்னதாதாவாக திகழும் சிவபெருமானுக்கு அவர் மக்களுக்கு அளிக்கும் அன்னத்தையே கொண்டு திருமஞ்சனம் செய்வதுதான் இந்த அன்னாபிஷேக உற்சவத்தின் தனிச் சிறப்பாகும்.

ஐப்பசி மாதம் அமாவாசை நாள் இந்தியா முழுவதும் தீபாவளியாகக் கொண்டாடப்படுகின்றது. அதே ஐப்பசி மாதம் பௌர்ணமி திதியும் அசுவினி நட்சத்திரமும் சேரும் புனித நாளில் அனைத்து சிவாலயங்களிலும் அன்னாபிஷேகம் சிறப்பாக அனுஷ்டிக்கப்படுகிறது. ஏராளமான பச்சரிசி அன்னம் வடிக்கப்பட்டு அந்த அன்னம் லிங்கத் திருமேனியை மூடுகின்ற வகையில் அபிஷேகம் செய்யப்படுகிறது. ஒரு சில ஆலயங்களில் அன்னபிஷேகத்தன்று ஆலயம் காய்கனிகளால் அலங்கரிக்கப்படுகிறது. காஞ்சிபுரம் மற்றும் திருவானைக்காவல் ஆலயங்களில் உள்ள குபேர லிங்கங்களுக்கு அன்னாபிஷேகம் மிகச் சிறப்பாகச் செய்யப்படுகிறது.



கும்பகோணத்திலிருந்து சுமார் 36 கி.மீ. தொலைவில் உள்ள கங்கை கொண்ட சோழபுரம் ஸ்ரீபிரஹதீஸ்வரர் ஆலயத்தில் உள்ள கருவறையில் இந்தியாவிலேயே மிகப் பிரம்மாண்டமான சிவலிங்கத் திருமேனிக்கு நடைபெறும் அன்னாபிஷேகம் மிகச் சிறப்பானதாகத் திகழ்கிறது. மாமன்னன் ராஜராஜனின் புதல்வனான முதலாம் இராஜேந்திரன் 1012 முதல் 1044 வரை கங்கை கொண்ட சோழபுரத்தை தன் தலைநகராக்க் கொண்டு ஆட்சி செய்தபோது தன் தந்தை போன்றே பிரஹதீஸ்வர்ருக்கு கட்டிய இந்தப் பெரிய ஆலயத்தில் உள்ள லிங்கத்தின் உயரம் 13.5 அடி ஆபுடையாரின் சுற்றளவு 60 அடி. ஆசியாவிலேயே பிரம்மாண்டமானதாக இந்த லிங்கம் கருதப்படுகிறது.

108 மூடைகளுக்குக் குறையாத அரிசி அன்னமாகத் தயாரிக்கப்பட்டு ஸ்ரீபிருஹதீஸ்வர லிங்கத்திற்கு அபிஷேகம் செய்யப்படுகிறது. அபிஷேகத்திற்குப் பின்னல் லிங்கப் பகுதியைச் சுற்றிலும் உள்ள அன்னம் நீர்வாழ் ஜீவராசிகளுக்காக ஆறுகளிலும் பிற நீர் நிலைகளிலும் கரைக்கப்படுகிறது. ஆவுடையார் பகுதி அன்னம் பக்தர்களுக்கு பிரசாதமாக விநியோகிக்கப்படுகிறது. இந்த மஹாபிரசாரத்தை சாப்பிட்டால் குந்தைப்பேறு இல்லாத தம்பதிகளுக்கு மகப்பேறு அமையும் என்ற நம்பிக்கை உள்ளது. மேலும் வாழ்க்கையில் உணவிற்குப் பஞ்சம் இருக்காது என்றும் பக்தர்கள் நம்புகின்றனர்.



திருக்காட்டுப்பள்ளிக்கு அருகில் உள்ள செந்தலை கிராமம் ஸ்ரீ மீனாட்சியம்மை சமேத ஸ்ரீசுந்தரேசர் ஆலயத்தில் இந்த அன்னாபிஷேக ஐப்பசிபௌர்ணமி அன்று மூலவர் லிங்கம் மீது சந்திரன் உதயமாகும் போது அதன் ஒளிக்கதிர்கள் விழுவது இத்தலத்தின் தனிச் சிறப்பாகும்.

பல நுற்றாண்டுகளாக இருக்கும் புராணங்களில் சரியான ஆதாரங்கள் இல்லை. இந்நாளில் சிவபெருமானை தரிசிக்க அன்னத்திற்குப் பஞ்சம் ஏற்படாது. அனைத்து வளங்களும் பெருகும் என்பது நம்பிக்கை. 2 மணி நேர அன்னாபிஷேகத்திற்குப் பின்னர் அன்னம் களையப்பட்டு மஹாபிஷேகம் நடைபெறுகிறது. அன்னம் நம் வாழ்க்கையில் எவ்வளவு இன்றியமையாதது என்பதை எடுத்துக்காட்டவே இந்த அன்னாபிஷேகம்.

தேரழுந்தூர், திருவல்லிக்கேணி, திருமலை போன்ற பிரபலமான ஆலயங்களில் ஆவணி மாத்த்தில் திருப்பாவாடை உற்சவம் என்ற பெயரில் அன்னாபிஷேகம் போன்றே ஒரு உற்சவம் கொண்டாடப்படுகிறது. அந்நாளில் ஏராளமான புளிஹோரை அன்னம், தத்யோன்னம், இனிப்பு வகைகள் பழங்கள் போன்றவை மூலவருக்கு முன்புள்ள அர்த்த மண்டபத்தில் அம்பாரமாகப் படைக்கப்பட்டு நைவேத்தியம் செய்யப்பட்டு பக்தர்களுக்கு விநியோகிக்கப்படுகிறது.

கோகுலத்தில் யாதவர்கள் இந்திரனை வழிபட்டு வந்தபோது, ஸ்ரீ கிருஷ்ணர் மக்களுக்கு இயற்கை வளங்களை அள்ளித் தரும் கோவர்த்தனகிரியை வணங்குமாறு அறிவுறுத்தி வழிபடச் செய்தார். ஸ்ரீ கிருஷ்ண பகவானின் அறிவுரைப்படி கோகுலத்துமக்கள் கோவர்த்தன மலையை வழிபட்ட நிகழ்ச்சியைக் கொண்டாடுகின்ற வகையில் தீபாவளியை அடுத்து வருகின்ற பிரதமை நாளன்று வட மாநில மக்கள், குறிப்பாக மதுராவில் உள்ள மக்கள் இந்நாளை கோவர்த்தன பூஜா என்றும் அன்னகூட் (அன்னம் படைக்கும்ஸ்ரீ விழா என்றும் கொண்டாடிவருகின்றனர். இந்நாளில் மக்கள் தங்கள் வீடுகளில் கிருஷ்ணர்சிலை அல்லது படத்தை வைத்து ஏராளமான உணவுப் பொருட்கள், இனிப்புகளை பகவான் முன் வைத்து அர்ப்பணம் செய்து வழிபடுகின்றனர். திருவாரூர் மாவட்டம், குடவாசலிலிருந்து சேங்காலிபுரம் செல்லும் சாலையில் அமைந்துள்ள ஸ்ரீ அன்னபூர்ணேஸ்வரிசமேத ஸ்ரீ அன்னபூர்ணேஸ்வரர் அனைவருக்கும் அன்னம் பாலிப்பதாக ஐதிகம். மேலும் இந்த்த் தலம் மஹாபாரதத்துடன் தொடர்பு கொண்டதாக்க் கருதப்படுகிறது. அள்ள அள்ளக் குறையாத அன்னத்தை தரும் சக்திவாய்ந்த அட்சயபாத்திரத்தை பாண்டவர்களின் தேவியான திரௌபதி, பகவான் கிருஷ்ணரிடமிருந்து இத்தலத்தில்தான் பெற்றதாக தல புராணம் குறிப்பிடுகிறது. இந்த ஆலயத்தில் உள்ள ஸ்ரீ அன்னபூர்ணேஸ்வரரை மனதார வழிபட்டால் அன்னத் துவேஷம் எனப்படும் அன்னத்தின் மீதுள்ள வெறுப்பு குணமகும் என்ற நம்பிக்கை உள்ளது.

SRI KANCHI MAHA PERIVA THIRUVADIGAL CHARANAM
NOV.2014 AMMAN DARSANAM MAGAZINE from SRINGERI SANKARA MADAM

[radha]

OM NAMA SHIVAYA


விளை நிலங்களில் நலம் தரும் அன்னாபிஷேகம்
By dn--in DINAMANI news paper
First Published : 24 October 2015


அண்டமோர் அணுவாம் பெருமைகொண்டு அணுவோர்

அண்டமாம் சிறுமைகொண்டு அடியேன்

உண்டவூண் உனக்காம் வகைஎன துள்ளம்

உள்கலந்து எழுபரஞ் சோதி

கொண்டநாண் பாம்பாம் பெருவரை வில்லில்

குறுகலர் புரங்கள்மூன்று எரித்த

கண்டனே! நீலகண்டனே! கங்கை

கொண்டசோ ளேச்சரத் தானே!

கங்கைகொண்ட சோழபுரத்திலுள்ள சிவபெருமானைக் கருவூர்த் தேவர் தமது திருவிசைப்பாவில் அவருடைய பெருமையைக் கூறும் பொழுது “அடியேன் உண்ட ஆகாரம் உனக்கு ஆகும் வகையாக எனது உள்ளத்தினுள் கலந்து எழுகின்ற மேலான ஒளி வடிவினனே!” என்று கூறுகின்றார். அதே போன்று ஆழ்வார் ஒருவரும; “உண்ணுஞ் சோறு பருகு நீர் தின்னும் வெற்றிலையும் எல்லாம் கண்ணன்” என்று பாடியுள்ளார். நாம் உண்பதற்கு ஏற்றவாறு இறைவன் கொடுத்ததில் ஒரு சிறு அளவை ஒருநாள் ஒருவேளை அவருக்கு அளிப்பது நாம் அவருக்குச் செய்யும் நன்றிக்கடன் ஆகும். அந்த நன்றிக்கடனில் ஒன்றுதான் அன்னாபிஷேகம்.

இறைவன்: கங்கைகொண்டசோழேச்சரர் பிரகதீஸ்வரர்; மூலவர் 13 அடி உயரம் ஆவுடையார் 60 அடி சுற்றளவு. இறைவி: பெரியநாயகி. விமானம் 160 அடி உயரம் 100 அடி சதுரமானது.

நவக்கிரக அமைப்பு: ஒன்பது கிரகங்களும் ஒரே கல்லில் செதுக்கப்பட்டுள்ளன. தாமரை வடிவம் போன்ற பீடத்தின் நடுவில் சூரியன். ஏழு குதிரைகள் பூட்டிய தேரை ஓட்டும் சாரதி அருணன் அருகில் 12 பேர் நாதஸ்வரங்களை வாசிப்பது தேரில் உலகை வலம் வரும் கோலம் அற்புதமானது. சுற்றிலும் ஏனைய கிரகங்கள் உள்ளன. சிங்கமுகக் கிணறு. சண்டேச அனுக்கிரக மூர்த்தி பார்க்கவேண்டியவைகளில் முக்கியமானவைகள்.

காஞ்சி சங்கராசாரியார் ஸ்ரீசந்திரசேகரேந்திர சுவாமிகளின் முயற்சியால் முப்பது ஆண்டுகளுக்கு முன் துவக்கப்பட்ட அன்னாபிஷேகம; பெரிய அளவில் இன்றும் நடைபெற்று வருகிறது. சுமார் 100 மூட்டை அரிசியால் சமைக்கப்பட்ட அன்னம் அபிஷேக ஆராதனைக்குப் பிறகு பக்தர்களுக்குப் பிரசாதமாக வழங்கப்படுகிறது. பெரம்பலூர் மாவட்டத்தில் தஞ்சைப் பெருவுடையார் கோயிலமைப்பை ஒத்துள்ள இக்கோயில் ராஜேந்திர சோழனால் கட்டப்பட்டது. 27-10-2015 ஐப்பசி மாதம் 10-ம் தேதி செவ்வாய்க்கிழமை பௌர்ணமியன்று அனைத்து சிவன் கோயில்களிலும் அன்னாபிஷேகம். சிறப்பாக நடைபெற உள்ளது. சிவன் அபிஷேகப்ரியர். அன்னம் சாம்ராஜ்யம் அளிக்கும் என்றும் விளைநிலங்களில் நல்ல விளைச்சல் தந்து நலம் தரும் என்றும் கூறப்படுகிறது. அன்று அருகிலுள்ள சிவன் கோயிலுக்குச் சென்று அன்னாபிஷேகம் கண்டு அரனைத் தரிசித்து அருள் பெறுவோமாக.

- மருத்துவர் கைலாசம் சுப்ரமணியம்