பாமரர் தேவாரம்: திருப்பழனம்

[saidevo]

திருப்பழனம்
(எழுசீர் விருத்தம்: வாய்பாடு 6 மா + புளிமாங்காய்)
(சீர்கள் ஒன்று-ஐந்தில் மோனை; ஈற்றடிச் சீர்கள் ஒன்று-மூன்றில் எதுகை)

அமைப்பு
சுந்தரர் தேவாரம் 7.41.1:
முதுவாய் ஓரி கதற முதுகாட் டெரிகொண் டாடல் முயல்வோனே
www.thevaaram.org/thirumurai_1/onepage.php?thiru=7&Song_idField=70410

கோவில்
temple.dinamalar.com/New.php?id=959
www.shivatemples.com/nofct/nct50.php
www.findmytemple.com/index.php/ta/தஞ்சாவூர்/t285-ஆபத்சகாயேஸ்வரர்,-திருப்பழனம்
www.dailythanthi.com/Others/Devotional/2014/06/06113434/Great-Designation-arulum-Abathsahayeswarar.vpf

தேவாரப் பதிகம்
சம்பந்தர் 01.067: வேதமோதி வெண்ணூல்பூண்டு
www.thevaaram.org/thirumurai_1/onepage.php?thiru=1&Song_idField=10670

அப்பர்
04.012: சொன்மாலை பயில்கின்ற
www.thevaaram.org/thirumurai_1/onepage.php?thiru=4&Song_idField=40120
04.035: ஆடினா ரொருவர்
www.thevaaram.org/thirumurai_1/onepage.php?thiru=4&Song_idField=40360
04.087: மேவித்து நின்று
www.thevaaram.org/thirumurai_1/onepage.php?thiru=4&Song_idField=40870
04.087: மேவித்து நின்று
www.thevaaram.org/thirumurai_1/onepage.php?thiru=4&Song_idField=40870
05.035: அருவ னாயத்தி
www.thevaaram.org/thirumurai_1/onepage.php?thiru=5&Song_idField=50350
06.036: அலையார் கடல்நஞ்ச
www.thevaaram.org/thirumurai_1/onepage.php?thiru=6&Song_idField=60360

காப்பு
பழனத் திறைமகனே பார்வதி மைந்த
மழவிடையன் மாசிலி மன்றாடி மேவும்
பழனப்பேர் பற்றிப் பதிகமொன்று பாடக்
கழல்பற்றி வேண்டினேன் காப்பு.

பதிகம்
(எழுசீர் விருத்தம்: வாய்பாடு 6 மா + புளிமாங்காய்)
(சீர்கள் ஒன்று-ஐந்தில் மோனை; ஈற்றடிச் சீர்கள் ஒன்று-மூன்றில் எதுகை)

கழலால் காலன் உதைத்து பாலன் .. காத்துக் கயிலை உறைவாரே
பழங்கண் கொள்ளா பத்ச சகாயர் .. பக்கம் பெருநா யகியென்றே
முழவும் பறையும் முறையாய் மறையும் .. முழங்கக் காணும் பெருமானாய்ப்
பழமை வினைகள் கழல வருளப் .. பழனத் தளியில் அமர்ந்தாரே. ... 1

[பழங்கண் = துன்பம், மெலிவு; பழனத்தீசன் பேர் ஆபத்சகாயர்;
ஈச்வரி பேர் பெரியநாயகி; தளி = கோவில்]

தலத்தின் தருவாய் வாழை விளங்கத் .. தாழை மலர்கள் மணம்வீசும்
கலையும் மானும் கையில் எரியும் .. காதில் தோடும் அசைந்தாட
நிலையில் வாழ்வில் நேரும் வினைகள் .. நிமலன் அருளால் நலிவெய்திப்
பலனாய் உலகில் பலவும் விளையப் .. பழனத் தளியில் அமர்ந்தாரே. ... 2

பயணம் கொண்டே பலவாய் வரமும் .. பதுமை பெற்ற தலமாகப்
பயண புரியின் ஈசன் ஆனார் .. பரவை பயந்த அமுதத்தைப்
பயன்கொள் முனிவர் குடிலில் அவுணர் .. பறிக்க ஐயன் உருச்செய்தே
பயந்தாள் காளி வயத்தை அழிக்கப் .. பழனத் தளியில் அமர்ந்தாரே. ... 3

[பதுமை = இலக்குமி; பரவை = கடல், இங்கு பாற்கடல்; பயன்கொள் முனிவர் = கௌசிக முனி;
அவுணர் = அசுரர்; ஐயன் = ஐயனார்; பயந்தாள் = பெற்றவள்; வயம் = வலிமை]

[saidevo]

சுசரி தனெனும் சிறுவன் கனவில் .. சுடுசொற் காலன் குறிசொல்ல
அசலன் அவனைக் காத்தே அருள .. ஆபத் சகாயன் பெயர்பெற்றார்
அசுரர் தம்மைக் காளி அழிக்க .. அமுத லிங்கம் முனிசெய்யப்
பசலை நீக்கப் பசுமை மருதப் .. பழனத் தளியில் அமர்ந்தாரே. ... 4

[அசலன் = அசையாக் கடவுள்; அமுதலிங்கம் முனிசெய்ய = கௌதமர் தன் பங்கு அமுதத்தால்
செய்த சிவலிங்கம்; பசலை = மனச்சஞ்சலம், வருத்தம்]

கோட்டச் சுற்றில் ஈசன் பிரம்மா .. கொள்-கை வீணை குருதேவர்
பாட்டி சைத்தே அரிதாய்க் குழல்கோ .. பாலன் உள்ளே வரும்சுற்றில்
கூட்டும் கையை நந்தி தேவர் .. கூப்பும் நிலையில் விழிகாணப்
பாட்டும் பண்ணும் காட்டும் வண்ணம் .. பழனத் தளியில் அமர்ந்தாரே. ... 5

வெளியே சுற்றில் கந்தப் பெருமான் .. வேழ முகத்தன் உடன்மேவ
உளியின் உருவாய்க் கோலச் சிலையாய் .. உள்ளேழ் மாதர் தவக்கோலம்
வெளியே சுற்றில் ஈசன் இடத்தில் .. வீற்ற ருள்செய் உமைமேவப்
பளிதம் காட்டும் ஒளியின் ஒளியாய்ப் .. பழனத் தளியில் அமர்ந்தாரே. ... 6

[பளிதம் = கற்பூரம்]

பழனம் பெருமை ஐந்தெ ழுத்தாய்ப் .. பரமன் தாமே புகழ்ந்தேத்தப்
பழனத் தலமாம் பயணேச் வரத்தில் .. பல்வே றுமுனி கதிசேர்ந்தார்
பழகும் அடியார் பரவும் அடிகள் .. பாவம் கொள்ளார்க் கருள்செய்தே
பழமை வினைகள் அழிக்கும் பரமாய்ப் .. பழனத் தளியில் அமர்ந்தாரே. ... 7

[அடிகள் = கடவுள்]
மலையைக் கெல்ல முயன்ற மூடன் .. வலக்கால் விரலால் நெரியுண்ண
மலையாள் பாகன் வருத்திப் பின்னர் .. வாளும் நாளும் அருள்செய்தார்
கலையைத் தலையில் நிலையாய் இலக்கிக் .. கங்கை தரித்த கறைக்கண்டன்
பலவாய் அடியார் குலவும் படிறன் .. பழனத் தளியில் அமர்ந்தாரே. ... 8

[வலக்கால் விரல் = இடப்புறம் உமையாள் இருப்பதால் வலக்கால் விரல்
என்று கற்பனை; இலக்குதல் = அடையாளம் இடுதல், இலங்கச் செய்தல்;
படிறன் = பொய்யன், கள்வன்]

எரியும் தூணாய் வானும் நிலமும் .. இணைத்தே ஈசன் உருக்கொள்ள
அரியும் அயனும் அடியும் முடியும் .. ஆரத் தேடி அறியாதார்
கரியின் தோலை உடுத்தே சூலம் .. கையில் தாங்கும் பெருமானே
பரியாய் ஆக்கி நரியைத் தந்தார் .. பழனத் தளியில் அமர்ந்தாரே. ... 9

வேதம் தள்ளும் வேற்று நெறிகள் .. மீது செல்லார் உளந்தன்னில்
நாதன் நம்பன் நக்கன் நடனன் .. நட்டன் நயனச் சுடரோனே
யாது மாகி நின்றே வினைகள் .. யாவும் தீர்த்தே வழிகாட்டிப்
பாது காப்பாய்ப் பாதம் காட்டிப் .. பழனத் தளியில் அமர்ந்தாரே. ... 10

கண்ணில் கண்ட உயிர்கள் யாவும் .. கருத்தன் நாடி வினையுரைக்கப்
பண்ணில் வேண்டி யப்பர் பதிகம் .. பாடப் பரமன் அருள்செய்தார்
கண்மேற் கண்ணன் சடைமேற் பிறையன் .. காழி யர்கோன் பணிந்தேத்திப்
பண்ணும் பதிகம் வண்ணம் காட்டப் .. .. பழனத் தளியில் அமர்ந்தாரே. ... 11

[கருத்தன் = கடவுள்; வினையுரைக்க = தூது சொல்ல; காழியர்கோன் = சம்பந்தர்]

--ரமணி, 20/04/2016

*****